Santzurtziko portuan su hartu du Befesa lantegiaren biltegi batek. 14:40 aldera gertatu da ezbeharra. Sufre likidoa jasotzen zuen biltegiak, eta sutearekin lehertu eta airera askatu du sufrea. Sutea kontrolpean hartu dutela zehaztu dute larrialdi zerbitzuek.
Lekura joan dira suhiltzaileak eta larrialdi zerbitzuetako langileak. Orain bertan ari dira lanean. Ertzaintzak kilometro erdiko segurtasun eremu bat jarri du, eta ez dela inor zauritu zehaztu du.
Sutearen eraginez bapore laino bat altxatu da. Zenbaterainoko toxizitatea duen aztertzen aritu dira Eusko Jaurlaritzako teknikariak, lekuan bertan.
SOS Deiak larrialdi zerbitzuen esanetan, lainoak arriskurik ez du eragin; herritarrak lasai egon daitezkeela erantsi dute.
