Juan Carlos I.a Espainiako erregeak katalanen independentzia aldarriari mezua bidali zion atzo, "ameskeriak" alboratzeko eskatuz, eta gaur Mariano Raxoi Espainiako gobernuburuaren txanda izan da, Kongresuan Rosa Diez UPDko parlamentariak eraginda. "Behar izango balitz Konstituzioa betearazi" egingo lukeela esan du Raxoik.
Lehengo astean Katalunian independentziaren aldeko Diada historikoa egin zuten.
Diezek iradoki dio hor dagoela 155. artikulua Espainiako Konstituzioan; hau da, autonomia desegiteko aukera. Presidenteak, bere erantzunean, ez du zehazki halakorik aipatu.
Pere Macias CiUko diputatuak Vicente del Bosque Espainiako futbol hautatzaileak lehengo astean Ser irrati katean esandako bat gogoratu du bere hitzaldian: "Herri bakoitzak bere etorkizuna erabakitzeko askatasuna izan behar du". Diadako manifestazioan izan ziren "milioi eta erdi lagunek" horixe eskatzen dutela esan du CiUkoak.
Maciasen arabera, "Katalunia ez doa inoren kontra", eta, aldiz, Kataluniak arlo ekonomikoan ez du tratu egokia jasotzen. CiUkoak esan du katalan gehienak ez daudela ados egoera horrekin.
Raxoi-Mas bilera bihar zerga sistemaz
Raxoik eta Artur Mas Kataluniako Generalitateko presidenteak bihar bilera egingo dute, Masen itun fiskalaren proposamenari buruz. Raxoik aurreratu du ez dagoela ados proposamenarekin, eta, gainera, azaldu du hau ez dela garai egokia hori eskatzeko. "Erantzukizuna" izatea galdegin du.
Felip Puig Generalitateko Barne sailburuak azaldu du Raxoi-Mas bilerak "Kataluniaren burujabetza fiskalean" aurrera egiteko balio beharko lukeela.
