Bruselako Auzitegiko epaile batek Ventura Tome Quiroga (Pasaia, 58 urte) ez Espainiaratzea erabaki du, Paul Beckaert defentsa abokatuak gaur arratsaldean jakin duenez. Epaileak dio Espainiako Auzitegi Nazionalaren euroagindu eskaera ez dagoela behar bezala arrazoituta. Defentsak, horretaz gain, argudiatu zuen Espainiako Estatuan "giza eskubideekiko errespetu falta" dagoela. Fiskaltzak 24 orduko epea du helegitea jartzeko.
Urriaren 28an atxilotu zuen Belgikako Poliziak Tome, Bruselan bertan, ETArekin lotuta. Guardia Zibilarekin elkarlanean egin zuen operazioa.
Auzitegi Nazionalak 80ko hamarkadan bi atentatu egitea leporatuta egin zuen Tomeren aurkako eskaera, eta gaur goizean egin dute euroaginduari buruzko auzi saioa. Orain arte badaezpadako atxiloaldian izan dute Bruselan.
Berri agentziek zabaldu zutenez, Tomek "nahikotxo urte" daramatza nortasun agiri faltsuekin Belgikan bizitzen. 1992an atxilotu zuten aurreneko aldiz, Frantzian, eta 1996an berriro. Sei hilabete preso egon ostean, Espainiaratu egin zuten, eta han, aske utzi, baldintzapean. Ihes egin zuen.
