Hurrengo urteko maiatzeko hauteskundeei begira, Podemos alderdiak nola aurkeztu beharko lukeen galdetu du BERRIAk bere azken inkestan. Emaitzen arabera, bakarrik aurkeztu beharko luke (%36). Horren ondotik, bi aukerak pareko babesa jaso dute: herri plataformetan aurkezteak, eta ez aurkezteak (biak %27). Azkenik, bi moduetara zioen aukeraren alde %10 agertu dira.
Horrez gain, seme-alabei paga ematearen gaineko inkesta ere martxan izan da. Adituen arabera, paga jasotzea haurrek dirua kudeatzen ikasteko modua da, eta inkestako parte hartzaile gehienek uste dute onuragarria dela (%78). Botoa eman dutenen %18rentzat, ordea, seme-alabei ez litzaieke pagarik eman beharko, eta %5ek ez dute ez baiezkoaren ez ezezkoaren alde egin.
Bi inkesta horiek amaituta, beste bat abiatu du BERRIAk, kirolari dagokiona, oraingo honetan. Realak izandako azken emaitzek ezinegona sortu dute taldearen inguruan. Kordoban berdindu eta Jagoba Arrasatek hanka eta erdi taldetik at zuela zirudien arren, Reala gidatzen jarraitzen du. Zure ustez, nor da Realaren egoeraren erantzule nagusia? Eman botoa, hemen.
