Berriro ere hautagai izateko indarrarekin aurkitzen du bere burua Agirre Arabako ahaldun nagusiak

Xabier Agirre Arabako ahaldun nagusiak (EAJ) ez du uste azkenaldiko ustelkeria auziak kalte egin dionik, eta, horrenbestez, berriro ere kargu horretarako hautagai izateko indarrarekin ikusten du bere burua. Hala esan du Radio Euskadin egin dioten elkarrizketan.

Ertzaintzak Arabako EAJrekin zerikusia duten zortzi lagun atxilotu ditu eroskeria, agintekeria eta diru zuriketa egotzita, haien artean, Alfredo de Miguel Tokiko Administrazioetarako diputatua -dimisioa eman du atxilotua eta auzipetua izan ostean-.

Auzi horri buruz dakien guztia komunikabideen bitarteaz dakiela agertu du Agirrek, eta eskatu du "epaiketa paralelorik" ez egiteko eta errugabetasun printzipioa errespetatzeko.