Nafarroako Gobernuak bertan behera utzi du Bertsolaritza irakaskuntzan programa, dirurik ez daukala argudiatuta. Nafarroako Bertsozale Elkarteak azaldu du telefono dei baten bidez jakinarazi diola gobernuak erabaki hori. Hiru urterako ituna sinatu zuten iaz Bertsozale Elkarteak eta Hezkuntza Departamentuak, eta bere kabuz hitzarmen hori etetea erabaki du gobernuak. Erabakia atzera botatzeko eskatu dio elkarteak Jose Iribas kontseilariari, eta sinatutako akordioa betetzeko. Planaren herena finantzatu du orain arte Hezkuntza Departamentuak.
1997tik dago abian Bertsolaritza irakaskuntzan programa Nafarroako D ereduko ikastetxeetan. Amaitu berri den ikasturtean, adibidez, 31 eskolatan aritu dira 1.100 ikasle. 48.000 euro jarri ditu aurten gobernuak; gainerakoa, udalek eta mankomunitateek. Datorren ikasturtean, ordea, planari laguntzeko diru saila kendu egingo du Iribasek.
Bertsozale Elkarteak nabarmendu du eskolek "ezin hobekiago" baloratu dutela programa hori eta horrela adierazi diotela Hezkuntza Departamentuari. "Bertsogintzaren oinarrizko ezagupenak eta teknikak ikasteko balio izateaz gain, Bertsolaritza irakaskuntzan programak bestelako onura asko ditu ikasleentzat: geletan euskara erabiltzeko modu ezin egokiagoa da, hizkuntzaren alderdi jostagarria erakusten die gaztetxoei, haiena ez den rol bat hartzen eta ondokoa entzuten ikasten dute, ahozkotasunaren garrantziaz jabetzen dira…".
