Guztira, 14 gazte atxilotu dituzte bart Donostiako alderdi zaharrean eta erdialdean, Segurtasun Sailak jakinarazi duenez. Ertzaintzari objektuak jaurtitzea eta kontainerrak kale erdira mugitzea leporatzen zaie. Istiluak 02:30ean hasi dira Andia kalean, eta, gero, ondoko kaleetan jarraitu dute. Ertzaintzak istiluen aurkako materiala erabili du gazteei oldartzeko.
Atxilotuetako lau adingabeak dira; 16 eta 17 urte artekoak. Horiek aske utzi dituzte, deklaratzeko zain. Gazteetako hamahiruri desordena publikoa egotzi diete, eta bati agintarien aurkako atentatua.
