Bilboko 10. instrukzio auzitegi epaile Ana Torresek seigarren ertzain bat deitu du deklaratzera inputatu gisa. Martxoaren 2an deklaratu beharko du auzitegian. 2012ko apirilaren 5ean gomazko pilota batek jo zuen buruan Iñigo Cabacas, Bilbon, Athleticen futbol partida baten ondoren. Hilaren 9an hil zen, kolpearen ondorioz. Lau urte inguru darama irekita auziak, eta ekainean bukatuko da instrukzioa amaitzeko legeak ezarritako epea.
Inputatutako ertzaina Iñigo Cabacas hil zeneko operatiboaren arduradunetako bat da, operatiboa izan zeneko gau hartan furgonetetako batean zegoena.
Orain arte, gomazko pilotak jarti zituztela onartu zuten hiru ertzain, furgonetetako arduradun bat eta polizia-etxetik operatiboa gidatu zuen ertzainburu bat zeuden inputatuta.
