Bi gizonezko atxilotu dituzte Bilbon bikotekideei eraso egitea leporatuta

Bikotekideak jotzea leporatuta bi gizonezko atxilotu ditu bart goizaldean Ertzaintzak Bilbon. Ertzaintzak iturriek agertu dutenez, Bilbo Zaharrean hartu dute atxilo bietako bat: goizeko lauak baino zertxobait lehenago emakume batek bere etxera joateko eskatuz deitu du Ertzaintzara, bikotekideak eraso egin diola azalduz. Esandako etxera joan eta emakumezkoak hainbat kolpe zituela ikusi dute, eta, horren ondoren, etxean bertan zegoen bikotekidea atxilotu egin dute.

Handik bi ordura Atxuriko eraikin bateko bizilagunek deitu dute Ertzaintzara, eskailera buruan emakume bat laguntza eske ari zela ohartaraziz. Hara joan direnean, emakumea zaurituta aurkitu dute. Bikotekideak jo duela eta ondoren etxetik bota duela agertu die ertzainei. Hori entzunda, gizonezkoa atxilotu egin dute, etxean bertan.