Bi lagun hil dira Amurrion eta Mallabian, trafiko istripuetan

Pertsona bat hil da gaur goizean Amurrion (Araba), A-625 errepidean izandako auto istripuan. Lekamaña bidegurutze parean izan da ezbeharra, goizeko zortziak baino zerbait lehenago: bi autok talka egin dute. Beste lagun bat zauritu egin da eta erietxera eraman dute.

Ertzaintza ari da istripua ikertzen, eta oraindik ez dute hildakoaren eta zaurituaren izenik-eta jakinarazi.

Mallabian (Bizkaia) ere beste lagun bat zendu da trafiko istripuan. Trabakua mendatean gertatu da, 9:00ak aldera. Bi autok eta furgoneta batek elkar jo dute BI-633 errepidean, Durangorako jaitsieran, eta furgonetan zihoan laguna hil da. Beste bi pertsona zauritu egin dira. Ertzaintza Ermuatik ari da trafikoa bideratzen.