Atzo egin zuten Alberto Plazaolaren euroagindu eskaeraren azterketa, Pauen (Okzitania). Bigarren aldiz egin dute auzia: joan den irailaren 15ean egin zuten lehenbiziko aldiz, eta bi prozedura akatsengatik gaur berriro egitea erabaki zuen epaileak. Ordukoan bi akats egin zituen Espainiako Auzitegi Nazionalak: gaztelera hutsean igorri zion Paueko Auzitegiari euroagindu eskaera, eta euroagindua eskatu zuen 1993 baino lehenagoko kasu baterako. Berez, estradizio eskaera behar luke, egozten zaion kasua 1987koa delako.
Xantiana Cachenaut abokatuak BERRIAri azaldu dioenez, oraingoan frantsesera itzulita bidali dituzte dokumentuak, baina berriro bidali dute euroagindu eskaera, estradizioaren ordez: "Harrigarria da, Espainiak hiru aste izan ditu prozedura behar den bezala bideratzeko, eta ez dute egin". Abokatuaren arabera, bai fiskala eta bai epailea euroagindua gibelera botatzearen alde agertu dira, eta, beraz, ostegunean Espainiaratzearen aurkako erabakia ematea espero dute.
Estradizioaren zain
Espainiak estradizio eskaerarik bideratuko duen ala ez, ez dakite ez abokatuak ez fiskalak, baina hori litzateke Plazaola Espainiaratzeko aukera bakarra. Eskaera iritsiko balitz, prozedura berriro hasieratik hasiko litzatekeela azaldu du Cachenautek. Kontrol judiziala bertan behera uzteko ere eskatu du defentsak.
