Ari da bukatzen Korrika, bi egun besterik ez dira falta, baina oraindik batzuek izerdi pixka bat bota beharko dute lasterka. Gaur Bilbon, esate baterako; 17:15 aldera heldu da Bizkaiko hiriburura. 17. Korrikaren azkenaurreko hiriburua izango da; aurretik pasatu zen Iruñetik, Baionatik, Mauletik, Donibane Garazitik eta, atzo, Gasteiztik.
Hor, besteak beste, lekukoa hartu zuten Blanca Urgell Eusko Jaurlaritzako Kultura sailburuak eta Lurdes Auzmendi Jaurlaritzako Hizkuntz Politikarako sailburuordeak.
Gaur goizean Enkarterrietan ibili da euskararen aldeko lasterketa. Hain zuzen, duela lau urte han hasi zen. Eguerdi aldera, 1880. kilometroan gertatu da anekdota: PSE-EEk eta ezker abertzaleak zuten erosita, baina ordezkari sozialista gaixorik dago eta ezker abertzaleko kideak eraman du lekukoa mila.
Igandean amaituko da Korrika, Donostian.
