Pandemiak baldintzatuta, baina egin dute Ibilaldia Bizkaiko ikastolen aldeko jaia Sopelan eta Leioan (Bizkaia), Ander Deuna eta Betiko ikastolek antolatuta. Antolatzaileen arabera, denera 1.800 lagun inguruk hartu dute parte festan; hori bai, bi txandatan eta lau gunetan banatuta.
Hainbat ekitaldi antolatu dituzte: hasierako ekitaldi bat, dantza ikastaroa, atzerriko kulturak ezagutzeko tailerra... Jaian parte hartu dutenez gain, erakundeetako eta Ikastolen Elkarteko hainbat ordezkari ere izan dira gaur Sopelan: besteak beste, Jokin Bildarratz Eusko Jaurlaritzako Hezkuntza sailburua, Koldo Tellitu Ikastolen Elkarteko lehendakaria edota Josu Landaluze eta Iban Rodriguez Sopela eta Leioako alkateak.
Hasierako ekitaldiaren amaieran, aurtengo antolatzaileek datorren urtekoei pasatu diete lekukoa: Bilboko Abusu ikastolakoei.
