Otxarkoagako Kepa Enbeita plazan egin dute elkarretaratzea, 20:00etatik aurrera. Juan Mari Aburto Bilboko alkatea eta Itziar Urtasun eta Nekane Alonso zinegotziak ere ekitaldian izan dira. "Isun gutxiago, neurri gehiago!" buila egin dute manifestariek, udal ordezkarien aurrean, eta Bilboko alkatea kritikatu ere egin dute.
Otxarkoagako Kepa Enbeita plazara itzuli da manifestazioa @berriapic.twitter.com/w1rDEFEm28
— Ibai Maruri Bilbao (@imaruribilbao) 2018(e)ko urtarrilak 19
Ostegunean 87 urteko senar-emazte batzuk hil zituzten Otxarkoagan, beren etxean. Ertzaintzaren hipotesia da lapurretan sartu zitzaizkiela etxean, eta han hil zituztela. Indarkeria zantzuak zituzten bien gorpuek. Gertakariek haserre handia eragin dute auzoan, eta bizilagun talde batek antolatu du protesta, ostiral iluntze honetarako.
Otxarkoaga ere mugitzen da. Aski da idatzia zuen pankarta batekin abiatu dira bizilagunak. Auzotik itzulia egin dute, eta hildako senar-emazteen etxe ataritik pasatu direnean minutu bateko isilunea gorde dute. Antolatzaileetako batek errespetua edukitzeko eskatu du momentu horretan.
Atzera, Kepa Enbeita plazara itzuli da martxa, eta han bukatu da protesta. Tarteka alkatearen aurkako oihu eta irain batzuk ere entzun dira, baina bestela zaintza gehiago, udaltzainen presentzia handiagoa eta segurtasuna handitzeko builak egin dituzte.
Manifestari bakan batzuek "Laguntza gutxiago, esku gogor gehiago" ere eskatu dute. Baina besteren batek ijito herriaren bandera ere eraman du eskuetan, agerian jarrita.
Protestaren bozeramaileen mezua neurritsuagoa izan da; auzoan segurtasuna handitzeko neurriak eskatu dizkiete erakunde publikoei.
Polizia gehiago
Hain justu, goizean hitz egin du Juan Mari Aburto alkateak, eta iragarri du kaleetan polizia gehiago jarriko dituela. Bilbon segurtasun faltarik dagoela ukatu du, eta ziurtatu du segurtasuna bermatzeko ari direla lanean udal agintariak.
Eusko Jaularitzako ordezkariekin bilera egin dute udal ordezkariek goizean. Segurtasun Planaren zirriborroa aurkeztu du alkateak. 25 puntu jasotzen ditu dokumentuak eta, besteak beste, Ertzainek eta udaltzainek elkarlana hobetzea da asmoetako bat.
