Bilbon ospatuko da hurrengo Euskal Eskola Publikoaren eguna

Ekainaren 6an Bilbon izango da Euskal Eskola Publikoen 20. jaia. Duela hogei urte antolatu zuten lehenengo aldiz Lasarteko hipodromoan Euskal Eskola Publikoaren aldeko eguna. Euskal Herriko Ikasleen Gurasoen Elkarteak (EHIGE) antolatzen du festa, eta beraiek diotenez, helburu berberarekin ibili dira ordutik: "Gure eskola aldarrikatzea hezkuntza-komunitate eta gizarte osoarekin egun eder bat partekatuz".

Hogeigarren urteurrena dela eta, jaialdia bertako "hiri garrantzitsuenetako batean" egitea erabaki dute, Euskal Eskola Publikoa Euskal Herriko hezkuntzaren oinarria dela adierazteko. XXI.mendean haurrek behar duten hezkuntza sistemari begira egingo dutela lan esan dute. EHIGEk beste egun batzuetan ere parte hartuko du: Ikas-bi Lapurdi, Behe Nafarroa eta Zuberoako eskola publikoetako gurasoen elkarteak antolatzen duen festan, eta baita ekainaren 12an Abaltzisketan (Gipuzkoa) antolatuko den Eskola Txikien jaian ere.