Bildu eta Sortu legez kanpo uzteko tramiteak hasteko eskatu dio fiskaltzari AVTk. Horien ustetan, ez dago jada "aitzakiarik" koalizioa eta alderdia erakundeetan mantentzeko, eta horrek "ETA indartu" egin duela salatu du. AVTk esan du Ondarroan gertatutakoa egoerak gainezka egin dezan falta zen gertaera dela, eta Laura Mintegi "harrokeriaz" aritu zela gaineratu du. AVTren arabera, inflexio puntua izan da Ondarroakoa: "Ezin da onartu Bilduk eta Sortuk Alderdien Legea urratzea".
AVTren arabera, bi horiek legeztatu zituztenetik "ez da pasa egun bat" Zuzenbide Estatuari desafio egin gabe. AVTren eskaerak bat egin du gaur La Razón egunkariak argitaratu duen zerrenda batekin: Ehun zantzu Bilduren aurka. Carlos Urkijo Espainiako Gobernuak EAEn duen ordezkariak zutabe bat idatzi du egunkari berean. Urkijok dio bere iritziz Ondarroan gertatutakoak Epaitegi Konsituzionalak Sortu legeztatu zueneko epaia gainditzen duela, eta esku hartzeko eskatu du.
