Bizkaiko Anbulantzietan askatasun sindikalik ez egotea salatu dute langileek, hango zuzendaritza, "Jaurlaritzaren babes osoarekin", langileen ordezkarien kontra neurriak hartzen ari direla. Joan den urriaren 8an Karlos Diaz Zubia LABeko ordezkaria kaleratu zuen Angel Luis Martinez Calleja enpresariak, eta jokatzeko modu hori ez dela berria nabarmendu dute langileek. 2009an LABeko ordezkari ohi bat kaleratu, eta orain bota duten Diazekin hamalau eguneko gose greba egin ondoren, berriz hartu zuten.
Galdera hauxe egiten dute protestaren harira bidali duten oharrean: "Nork bota dezake Jose Luis Bilbao edo Iñigo Urkullu bat?" Langileen ordezkariak ere boto bidez demokratikoki aukeratzen dituztela-eta "babesgabetasuna" salatzera atera dira: "Egoera hau Jaurlaritzaren Osasun Sailak babesten du, zeinak biluzik utzi gaituen". Hori eszenifikatzera etorri da gaurko protesta.
