EH Bilduk gogor salatu du EAJren jarrera. Aurrekontuei buruzko eztabaida azalpenik eman gabe atzeratzea egotzi dio; eztabaidari heldu beharrean epeak luzatzea, alderdi interesengatik, "bere ahultasuna disimulatzeko".
"Jokamolde horren atzean, Eusko Legebiltzarreko aurrekontuen negoziazioa egon daiteke", ohartarazi dute Oskar Matutek eta Irune Sotok EH Bilduren izenean; "kromo trukea".
EAJ PPrekin akordioa egin nahian ari den susmoa ere badute. Eta Matutek uste du EAJk eta PPk Bizkaiko aurrekontuak onartzeko akordioa egiten badute EAJri zail egingo zaiola elkar ulertze hori azaltzea: "EAJk dio PPrenarekiko desberdina den politika egiten duela, baina aurrekontuak onartzeko PPren beharra badu...", hausnartu du Matutek.
