Akordiorako bidea urratzen hasi dira Bizkaiko zahar etxeen auzian. Enpresa nagusiak, Gescak, eskaintza bat jarri die mahai gainean langileei, eta haiek onartu egin dute proposamena. Joan den ostiralean bildu ziren langileen ordezkariak eta enpresa, astelehenean ere bai, eta proposamena ontzat jo dute beharginek.
ELAko ordezkarien arabera, Gescaren proposamenak aintzat hartu ditu langileek hogei hilabeteko gatazkan mahai gainean jarritako “aldarrikapen guztiak”. Besteak beste, 35 orduko lan astea ezartzea eskatzen dute langileek, 1.200 euroko soldata eta ratio apalagoak.
Gescaren proposamena onartu badute ere, oraindik ez da lan gatazka amaitu. Negoziazio mahaian ordezkaritzaren %40 du enpresa horrek. "Akordioa egin dadin eta langile guztiei eragingo dien ituna sina dadin, patronalaren aldetik gehiengoa behar da", ohartarazi du Gaizka Miguel ELAko ordezkariak. Horregatik, protestekin jarraituko dute langileek. 5.000 behargini eragiten die lan gatazkak.
Gescarekin adostasuna egin izana "mugarri garrantzitsutzat" jo du ELAk, baina nabarmendu du gutxienez beste bi enpresetako batek ere bildu behar duela adostasunera.
