Frantziako Justiziak bost urteko kartzela jarri dio gaur Juan Carlos Iurrebasori, ETAkoa dela egotzita. 2007ko martxoaren 28an atxilotu zuten, Perigueux, Poliziaren errepide kontrol batean.
Iurrebasok berak epaiketan —joan den irailaren 1ean bukatu zen— berretsi zuen atzeman zutenean ETAren negoziazio taldeko kide zela, Espainiako Gobernuarekin negoziazio betean zeudela orduan, eta hitzartuta zeukatela negoziazio garaian atxiloketarik ez egitea. Frantziako Poliziak kontrolen batean-edo negoziazio taldekoak atxilotzen bazituen libre utziko zituztela ere hitzartua zuten, Iurrebasoren arabera. Hark zioenez, Kepa Mirena Suarezekin batera atxilotu zutenean, horregatik zeuzkaten Espainiako eta Frantziako polizietako bina goi kargudunen telefono zenbakiak. Hala ere, ez zituzten aske laga.
Iraileko auzi saioan epaileak berretsi egin zuen telefono horien gainean egindako ikerketek argitu zutela zenbakiak Espainiako eta Frantziako Barne ministerioetakoak zirela.
2006an hasi eta 2007an jarraitu zuten negoziazio aldirako, gutxieneko batzuk hitzartu zituzten Espainiako Gobernuak eta ETAk, erakunde armatuaren bertsioaren arabera.
Iurrebaso iazko irailetik baldintzapeko askatasunean dago, bihotzeko arazoengatik.
Frantziako auzitegiak Suarezi ere bost urteko espetxe zigorra jarri dio.
Aitor Elizarani, berriz, hiru urteko kartzela, Igor Suberbiolari bi urte eta erdikoa, Jon Salaberriari ere bi urte eta erdikoa eta Iratxe Sorzabali hirukoa, ETAren talde politikoko kidetzat jota. Sorzabal ez beste denak preso dauzkate.
