Iñigo Cabacasen heriotza argitzeko, epaileek "presiorik eta inor tartean sartu gabe" lan egin dezaten nahi du Eusko Jaurlaritzak. Hala azaldu du gaur Josu Erkoreka Jaurlaritzako bozeramaileak, gobernu kontseiluaren ostean eginiko agerraldian.
Cabacas pilotakada batez jo zuten egunean Ertzaintzak izandako hainbat barne komunikazio argitaratu zituen atzo Gara egunkariak. Entzuten zenez, Deustuko ertzainburuak "guztiarekin" Cabacas zegoen tabernara sartzeko agindu zion ertzain bati, nahiz eta hark ohartarazi liskarrik ez zela eta egoera kontrolpean zutela.
Horren inguruan galdetu diote gaur Erkorekari. Esan du Jaurlaritzak argitu egingo dituela ikerketa judizialetik eratorritako erantzukizun guztiak eta, hala egin behar izatekotan, "barne diziplinan beharrezko zorroztasunarekin" jokatuko duela.
Edonola ere, gaur-gaurkoz egin beharrekoa epaileari laguntzea dela gaineratu du Erkorekak, betiere "presiorik eta inor tartean sartu gabe", epaileak "lehenbailehen" argi dezan auzia.
