El País egunkariak Luis Barcenas PPko diruzain ohiaren agirietan oinarrituta argitaratutako informazioaren arabera, Jaime Ignacio del Burgo PPNko diputatu ohiari 3.900.000 pezeta —23.439,7 euro— ordaindu zizkion PPk ezkutuan. Del Burgok berak onartu zuen diru hori jaso izana, baina Calixto Aiesak atzo jakinarazi zuen diru hori berarentzat zela eta Del Burgok jasotzen ziola Madrilen.
Ohar bat plazaratu zuen atzo Nafarroako Gobernuko Osasun kontseilari ohiak. Haren arabera, 1991n Nafarroako Gobernua osatzeko akordio bat egin zuten PPNk eta UPNk, eta Aiesa proposatu zuen PPNk gobernuko kide izateko. Horrek, Aiesaren beraren esanetan, dermatologia kontsulta uztera behartu zuen, eta ekonomikoki "kalte larriak" eragin zizkion.
Hortaz, PPk erabaki zuen "behin-behineko konpentsazio" bat ematea, egoera berrira egokitzen zen artean. Aiesak argitu du diru hori jasota ez zutela egin inolako arau hausterik.
Bestalde, ustezko ezkutuko ordainketa kasuen ekaitz betean batzartuko da gaur Mariano Rajoy Espainiako Gobernuko presidentea Angela Merkel Alemaniako kantzilerrarekin.
