Dani Maeztu Aralarreko legebiltzarkidearen eta koordinatzaileordearen arabera, "konfiantzak porrot egin du", baina hala ere, "egoera bere onera bueltatzea" espero du. Elkarbizitzarako lan taldea osatzerakoan Aralarreko zuzendaritzak "zehazki eta espresuki" esandakoari men ez egiteagatik, haien karguak alderdiari itzultzeko eskatu die Aralarrek Aintzane Ezenarro, Mikel Basabe eta Oxel Erostarbe legebiltzarkideei.
Aralarreko zuzendaritzak ez du epe jakinik jarri haien karguak alderdiaren esku jar ditzaten, eta "egoera nola kudeatu aztertzeko" elkarrizketak hasiko dituztela jakinarazi du Maeztuk, gaur Radio Euskadin egindako adierazpenetan.
"Ez dago eperik, uste dugu ez dela beharrezkoa izango, eperik jarri gabe erantzun bat izango dugula uste baitugu", adierazi du.
Legebiltzarkideak "proiektu politiko baten baitan aurkezten" direla gogorarazi du; hala ere, Maeztuk nabarmendu du auzia "berbideratzeko" itxaropena duela.
