"Atzerapauso ulertezina" iruditzen zaio Eusko Jaurlaritzari PPk Abortuaren Legea erreformatzeko prestatu duen lege proposamena, baina, behin onartuta, saihesteko ahalmen "mugatua" izango lukeela esan du Darponek. Eusko Legebiltzarrean mintzatu da, EH Bilduk egindako galdera baten harira. Lege proposamenak oraindik aldaketak izan ditzakeela adierazi du, eta ezin dela jakin zehazki zer ekarriko duen. Argi dago, ordea, abortatzeko eskubidea nabarmen urrituko duela; plazaratu duten lehendabiziko testuaren arabera, soilik bortxaketen ondorio diren haurdunaldiak eten daitezke, edo haurdunaren bizitza arriskuan dagoenean. Ia guztiz galarazten du, beraz, abortuak egitea. Eta prozesua zaildu eta luzatu egiten du, gainera. Kalean, protesta giroa da nagusi; biharko ere hainbat deialdi daude eginda.
EH Bilduko legebiltzarkide Lur Etxeberriak Eusko Jaurlaritzari eskatu dio oraingo legeari eusteko. PPk prestatutako lege proiektua "frankismoaren errautsetatik" sortutakoa dela salatu du. "Patriarkatu usaina du, eta benetako kalbario bat ezarri nahi die emakumeei".
