Datorren astean beteko dira 75 urte Barakaldo eta Bilbo hartu zituztela

Datorren astean 75 urte beteko dira faxistek Barakaldo eta Bilbo hartu zituztenetik. 1937ko ekainaren 19an sartu ziren Bilbora, eta hiru egun geroago Barakaldora. Urteurrena oroitzeko hainbat ekitaldi antolatu ditu Barakaldoko Oroimen Historikoaren Koordinakundeak. «Euskal Herria frankismoarengandik defendatzeagatik ondorioak pairatu zituzten gizon eta emakumeak omendu nahi ditugu», esan du elkarteak. Gerra garaiko sindikatu eta alderdiek osatutako mahai inguru bat prestatu dute ostegunerako, eta ostiralean, urteurrenaren egunean, oroigarri bat jarriko dute Anaien Parkean. Maria Gago egun hartako lekukoa izango da hizlari.