Iñigo Urkullu lehendakaria Javier De Andres Arabako ahaldun nagusiarekin eta Martin Garitano Gipuzkoakoarekin bildu da gaur. Javier De Andresek bileraren ostean jakinarazi duenez zerga batzuk "modu neurtuan" igotzea proposatu dio Urkulluri, eta baita enpresen sorrera eta komertzioen irekiera arautzen duen legedia "liberalizatzea" ere.
Andresen hitzetan, aldundiek zerga bidez jasotzen duten diru kopuruak behera egin du nabarmen, eta fiskalitatea modu horretan aldatzea da irtenbide bakarra, gerora enplegua sustatu eta enpresei laguntzeko.
Martin Garitano Gipuzkoako ahaldun nagusiak, aldiz, zerga "justuagoak" eskatu dizkio Urkulluri. "Gehien duenak gehiago ordain dezala", nabarmendu du Garitanok. Espainiako Gobernuaren murrizketei euskal erakundeetatik aurre egin behar zaiela ere esan dio ahaldun nagusiak Urkulluri. "Herri gisa" erantzuteko deia egin dio.
Josu Erkoreka Jaurlaritzako bozeramailearen iritziz, zerga politikari dagokionez "garai berri bat" abiatu dute bi bilera horiekin.
