Denis Itxaso (PSE) izango da San Marko Mankomunitateko presidentea, Ainhoa Intxaurrandietaren (Bildu) ordez. EAJk eta PSEk akordioa lortu dute mankomunitateko presidentetza Itxasoren esku uzteko. Uda aurretik udaletan egin zituzten mugimenduak: Lasarte-Oriako eta Donostiako udalek mankomunitatean dituzten ordezkariak aldatu egin zituzten, Bilduri gehiengoa kentzeko. Orain, gehiengoa eskuratuta, mankomunitateko buruzagitza aldatuko dute.
PSEk ez du nahikotzat jo EAJrekin lortutako akordioa, oraindik ere Bilduk izango baitu gehiengoa GHK Gipuzkoako Hondakinen Kudeaketan. Horregatik, "ausart" jokatzeko eskatu die jeltzaleei; diputazioaren kontrako zentsura mozioarekin bat egiteko eskatu die.
