DNA azterketak frogatu du igandean Arga ibaian Etxaurin (Nafarroa) agertu zen gorpua Darwin Fernando Piedra Morochorena dela, abenduaren 26an Iruñean desagertu zen gaztearena. Nafarroako Osasun Institutuak egin zion azterketa atzo, eta gaur jakinarazi dituzte emaitzak.
Gorpuak, hasiera batean, ez zuen biolentzia arrastorik, baina usteltze fase aurreratu batean zegoen. Litekeena da aurreko asteko euriteen ondorioz Argak izan duen ur emariaren gorakadak gorpua zegoen lekutik mugitu izana. Piedra Ekuadorren jaioa zen, eta orain dela hamar urtetik bizi zen Iruñean; 18 urte zituen.
