Manifestaziora deitu du Donostia Antitaurina Orain plataformak, Aste Nagusiko jaien lehen egunerako. Zezenketen aurkako urteroko aldarriaz gain, herri galdeketarena ere aterako dute kalera parte hartzaileek. Datorren otsailean egingo du udalak zezenketei buruzko galdeketa, eta hori gogorarazteko baliatu nahi dute martxa. Herri galdeketa orain! Zezenketarik ez lelopean egingo dute.
Plataformaren ustez, "ulergaitza" da udalak zezenketak egitea baimentzea. Zezenketak eta kultur hiriburutza "bateraezinak" iruditzen zaizkie plataformako kideei: "Donostiaren izena lausotzen eta zikintzen dute zezenketek".
Martxa "lasaia" eta "jai girokoa" izatea nahi dute antolatzaileek, eta bertan parte hartzera deitu dituzte "animalien aurkako tratu txarrak" salatu nahi dituzten herritarrak. Abuztuaren 13an izango da urteroko martxa, arratsaldeko 18:00etan Bulebarrean hasita.
