Larunbatean Andoaingo (Gipuzkoa) inbestidura saioan gertatutakoa zeresan ematen ari da oraindik. PSE-EEren eta EAJren akordioa tarteko, Maider Lainez sozialista alkate izendatzea espero zen, baina ustekabean lau ordezkari jeltzaileetatik batek diziplina hautsi, eta ez zuen bete hitzartutakoa. Boto zuria sartu zuen hautetsontzian, eta ondorioz, EH Bilduko Ana Karrerek hartu zuen alkate makila beste lau urterako. EAEko Fiskaltza Nagusiaren arabera, "alderdien borondatea "desitxuratu" du gertatutakoak, eta bide batez boto emaileena. Juan Kalparsoro fiskal nagusiak azaldu duenez larunbateko saioko akta ikertuko dute eta idazkariari ere hainbat galdera egingo dizkio. Asteazkenean Bilbon deklaratu beharko du, hain zuzen.
"Hipotesi guztiak zabalik daude" fiskaltzaren arabera. CadenaSer irratiak zabaldu duenez, fiskaltzak idatzian jasotzen du erabaki guztiek arrazoiren bat eta ondorioren bat izaten dutela. Hori horrela, EAJko ordezkari batek "isilean" jokatu zuela-eta, uste du legez kanpoko arrazoiak egon daitezkeela, edo "askatasunik gabe" aritu izan daitekeela. Zentzu horretan, Kalparsorok azaldu du Andoain ez dela "herri bat gehiago": "Terrorismoak intentsitate handia izan du Andoainen".
Ana Karrere Andoaingo alkatearen esanetan, "lotsagarria" da ikerketa bat abiarazi izana eta salatu du hainbat komunikabide eta alderdi "benetakoa ez den irudi bat" ematen ari direla Andoainen inguruan: "Herrian ez da ikusten saltzen duten krispazio hori". Hori dela-eta, "interes politikoak" alde batera uzteko eskatu du Karrerek. "Andoaindarrak oso nekatuta gaude komunikabideen jo jomugan egoteaz".
