EAEn akordio «integratzailea» egin nahi du EAJk estatus politikoa aldatzeko

EAErentzat «autogobernu estatus berria» lortu nahi du EAJk 2015. urtean, Espainiako Estatuarekin «alde biko harremana» izatea ekarriko duena. Horretarako, ordea, EAEko «indar politiko nazionalisten eta ez nazionalisten arteko akordio integratzailea» egin nahi du lehenik. Eusko Legebiltzarrean aurkeztuko litzateke ekimena, baina aurrez alderdien artean adostuta. Legebiltzarraren babesa lortuta, Espainiako Gorteetara eramango lukete, «baina, edoizein kasutan, euskal gizarteak berretsi beharko luke».

Halaxe azaldu du EAJren lehendakarigai Iñigo Urkulluk Ser irratian egindako elkarrizktan, eta zehaztu du «oinak lurrean» dituela: «Orain, krisi ekonomikoa da gure lehentasuna. Horretan jardun nahi dut hasieran, lehendakari banaiz». Gainera, Urkulluk argitu du erabakitze eskubideari buruzko ibilbide orria egina dagoela, eta hain zuzen, 1990ean Eusko Legebiltzarrak onartu zuen legean dagoela jasoa.

Nafarroa eta «marra gorria»

Urkulluk adierazi du jabetzen dela errealiate juridiko-administratiboaz ere: «Pragmatikoak gara, eta badakigu zein zoru den zapaltzen duguna». Horrela, azaldu du EAJk proposatzen duen estatus politiko berriak «harreman instituzional bat» izango lukeela Nafarroako Foru Erkidegoarekin. Dena den, EAEren kontzertu ekonomikoa da Urkullurentzat «urgentziaz» defendatu beharrekoa, ekonomia biziberritzea ahalbideratuko duena, eta beraz, gainditu ezin den «marra gorria».