EAJ ez da izango alderdi modura Herrira-k urtarrilaren 12rako euskal presoen eskubideen alde antolatutako manifestazioan. Koldo Mediavilla EAJren EBBko erakunde arduradunak azaldu du espetxe politika "kalean presioa egitearen bidez" alda daitekeela baina EAJk "berezko bideak" dituela.
Mediavillak esan du argudio horiek eman dizkiela Herrira-ri, martxaren talde sustatzaileari, EPPKri eta Senideak elkarteari manifestaziora ez joateko. Haren hitzetan, "salbuespeneko" hainbat lege "terrorismoa" zegoen garaian sortu ziren, baina, halakorik ez dagoenez, arau horiek desagertuz joango dira.
Horren harira, Mediavillak gogorarazi du Iñigo Urkullu Eusko Jaurlaritzako lehendakariak Mariano Raxoi Espainiako Gobernuko presidenteari agiri bat eman ziola uztailean, Urkulluren ustez espetxe politikan eta "giza eskubideen berrezarkuntzan" egin beharreko urratsak zeintzuk diren azalduz.
