Ahal Dugu-ko idazkari nagusi hautatu zutenean iragarri zuen Nagua Albak gainontzeko alderdietako ordezariekin biltzeko asmoa. Hain zuzen, gaur hasi dute bilera saila, eta EAJ izan da elkarrizketa mahaian esertzen lehena.
Eguerdian bildu dira bi aldeak EAJren Bilboko egoitzan. Han izan dira EBBko buru Andoni Ortuzar, Bizkai Buru Batzarreko Itsaso Atutxa eta EAJren harreman instituzionaletarako kide Koldo Mediavilla; Ahal Dugu-tik, berriz, Alba bera, Lander Martinez antolakuntza idazkaria eta Eduardo Maura politikagintzarako idazkaria joan dira.
Bilera "adeitsua" egin dutela azaldu du Albak, bileraren ostean, baina beraien asmoa EAJ Jaurlaritzatik kentzea dela berretsi du. Izan ere "aldaketa" eragin nahi dutela dio, eta beraien iritzian, aldaketa egiterik ez dago jeltzaleek agintean jarraitzen duten bitartean.
Martxoaren 7an hautatu zuten Alba alderdiko idazkari nagusi, Roberto Uriarte buru zuen zuzendaritzak abenduan dimisioa eman ostean.
