EAJk eta PSE-EEk bilera egin dute gaur Eusko Legebiltzarrerako "gobernagarritasuna ahalbidetuko duten akordio politikoak lortzeari begira", eta bilera ostean elkarrekin zabaldu duten oharrean azaldu dutenez, "ordezkaritza bien arteko bilera produktiboa eta positiboa izan da, talde bien artean ireki den eztabaidan aurreikusitako gai guztietan sakontzeko erabakia hartu da".
Koldo Mediavilla, Joseba Egibar, Josu Erkoreka eta Jesus Peña izan dira bileran EAJtik, eta Iñaki Arriola, Miguel Angel Morales, Begoña Gil eta Jose Antonio Pastor PSE-EEtik.
Jeltzaleen proposamenari "erantzun globala" eman dio PSE-EEk, eta sakontzekotan gelditu dira. Hain justu, oharrean azaldu dutenez, gaur zehaztu dute bileretarako metodologia eta hurrengo batzarretarako egutegia. "Diskretuak" izango direla diote.
