Ramiro Gonzalez Arabako Batzar Nagusietako EAJren bozeramaileak adierazi duenez, "Forondan ordutegia murrizten duten bitartean, Aenak eta PPk Burgosko aireportua kargarako indartu eta ikur bihurtu nahi dute, "egunean 24 orduz aritzeko aukerarekin".
Gonzalezen hitzetan, Aenak Burgosko Garraio Zentroari 200.000 metro koadro utziko dizkio bere azpiegitura handitzeko, eta horri esker horren eta aireportuaren arteko distantzia murriztu ahal izango da. Gaur egun bost kilometrora dago logistika azpiegitura hori Burgosko aireportutik.
"Operazio horren helburua da nazioarteko karga operadora handiak erakartzea, lurra prezio lehiakorrean salduz eta aireportua eta aduana zerbitzuak 24 ordutan eskainiz", esan du Gonzalezek ohar batean. Adierazi du Forondaren kontrako erasoa dela, eta kezka agertu du EAJkoak.
"Oso larria da Forondarekin gertatzen ari dena. Alderdi Popularrak gure aireportua itxi nahi du. Egunetik egunera garbiago dago". Gonzalezek horregatik Maroto Gasteizko alkatea eta De Andres Arabako ahaldun nagusia kritikatu ditu: "Rajoyren txotxongilo dira".
