Greziako bankuek itxita jarraituko dute, Europako Banku Zentralak ez baitie baimenik eman diru gehiago mailegatzeko, eta 89.000 milioi eurotan utzi du ELA izeneko likidezia lerroa. Finantzaketa horri esker daude bizirik Greziako lau banku nagusiak, azken asteotan bizkortutako kapital ihesak beren bezeroen eskakizunei erantzuteko ia dirurik gabe utzi baititu.
Bruselako bileraren ondoren ELA handitu eta Greziako bankuak berriro irekitzeko aukera egongo zela uste zuten analista ekonomiko batzuek. Banku zentralak, ordea, itxarotea erabaki du, Greziak eurogunearekin lortutako ituna bete eta zenbait erreforma indarrean jarri arte.
EBZ etzi bilduko da berriro euroguneko egoera ekonomikoa eta Greziaren kasua aztertzeko, eta ostegunean hedabideen aurrean azalduko da Mario Draghi bankuko presidentea.
