Bihar abiatuko da aurtengo Korrika, hemezortzigarrena, Andoaindik (Gipuzkoa), eta bertan antolatu duten egitaraurako lanak aurreratzen ari dira Martin Ugalde kultur parkean.
BERRIAk informazio zabala egingo du Korrikaren hemezortzigarren aldiaz. Arratsaldean ekingo dio parketik, 16:30ean, eta, horren aurretik, mahai ingurua prestatu du BERRIA.INFOk. 12:00etan hasiko da saioa, eta han izango dira Joanmari Larrarte BERRIA Taldeko kontseilari ordezkaria, Mertxe Mugika AEK-ko koordinatzaile nagusia eta Bea Salaberri AEK-ko kidea.
Horrez gain, egunero-egunero zuzeneko kontakizuna egingo du Garikoitz Goikoetxea kazetariak. Halaber, igandea izanagatik ere aurtengo Korrikaren azken egunaren berri zuzenean emango du BERRIA.INFOk, Baionan.
Mugika, Ereiaron
Ekitaldian parte hartzera eta "euskara elkarri ematera" deitu du Mertxe MugikakEreiaro euskara kanalean. "Emozioz beteriko 11 egun izango dira. Korrika igaroko den herri guztietan une magikoa gozatzeko aukera izango dugu, bide bazterretan eguneko edozein ordutan, euskararen aldeko lasterketa erraldoia noiz iritsiko zain", adierazi du.
