Sanzek, Mirandak eta Maiak inputatuta deklaratu beharko dutela jakin eta biharamunean, Iruñeko alkatearen dimisioa eskatu du EH Bilduk. Haien ustetan, Maiak ez du dimisioa ematea ez den "beste aukerarik". EH Bilduk adierazi du Maiak deklaratu aurretik eman beharko lukeela dimisioa, eta justiziaren aurrean "hiritar soil bezala" agertu. "Erabaki hori hartu behar du ardura politikoagatik eta hiritarrekiko errespetuagatik", gaineratu dute.
2010ean Yolanda Barcinak ustelkeriaren gainean esandakoa izan dute gogoan. Nafarroako lehendakariak orduan esan zuen ustelkeria kasu batean inputatutako edonork kargua utzi beharko lukeela. Koalizioaren arabera, Nafarroak "politika egiteko eredu gris eta zaharkitu horren aurrean alternatiba behar du". Horrela, "gardentasunean eta zintzotasunean" oinarrituko den eredu berri bat aldarrikatu du EH Bilduk.
