"Garaiz dago oraindik gobernua. Gobernuaren teilatu gainean dago pilota. Gobernuari dagokio pentsiodunen bizi baldintzak hobetzeko nahikoa izango den eskaintza aurkeztea", irmo azaldu da Maddalen Iriarte EH Bilduko bozeramailea aurrekontuen inguruan Donostian egindako agerraldian. Hala, Jaurlaritzari "bigarren aukera bat" ematen diotela adierazi du Iriartek. Baina, ongi azpimarratu ditu zein diren koalizioaren marra gorriak: "Gobernuak badaki zeintzuk diren gure bi zutoinak: diru-partida nahikoak bideratzea pentsio baxuenak osatzeko eta osagarriak jasotzeko baldintzak malgutzea".
Izan ere, joan den astean egin zuten aurrekontuak negoziatzeko bigarren bilera, eta akordioaren bila segituko dutela azaldu zuten ondoren bi aldeek. Hala ere, Jaurlaritzak aurkeztutako aurrekontu proiektuek pentsioentzako emandako diru kopurua "onartezina" dela dio koalizioak: "Hitz egiten ari gara 400 eurorekin bizi diren alargunei buruz. Hitz egiten ari gara senarraren pentsioen menpe bizi diren emakume pobreei buruz. Horiei guztiei gutxieneko duinak bermatu nahi dizkiegu, pentsio osagarrien bitartez", ohartarazi du Nerea Kortajarena legebiltzarkideak.
Honenbestez, atzo Pedro Azpiazu Ogasun Sailburuak esan moduan, ez da EH Bilduren osoko zuzenketarik izango ostiraelean, eta negoziatzen segituko dute Jaurlaritzak eta koalizioak. EH Bilduk, ordea, argi adierazi du aurrekontuen aurka bozkatuko duela datorren abenduaren 11an "ezinbesteko" jo dituen bi oinarri horien inguruan adostasunik lortzen ez badute.
