"Sinesten dugu Bidegi ereduan". Erakunde publikoaren jardunaren defentsa irmoa egin du gaur goizean erakundearen egoitza nagusian, Zarautzen, Gipuzkoako Foru Aldundiko Bide Azpiegituretako diputatu Aintzane Oiarbidek. Erakundeko zuzendari Alfredo Etxeberriaren ondoan datu sorta bat plazaratu du Bidegiko finantza egoera ona dela erakusteko; esaterako, iazko jarduna 22 milioi euroko saldo positibo batekin amaitu dela nabarmendu dute. Bidegik finantza erakundeekin hitzartutako zorra pagatzeko arazorik ez duela erakusteko datu bat nabarmendu dute: zorraren zerbitzuaren ratio estaldura beti ezarritako mugatik —1,1— gorakoa izan da. 2011n 1,25ekoa, 2012an 1,44koa, 2013an 1,21ekoa, 2014an 1,53koa eta iaz 1,33koa.
Datu horiekin erantzun nahi izan diete aurreko legealdian EH Bilduren gobernuak Bidegiren bideragarritasun ekonomikoaren inguruan plazaratutako zalantzei. Bidegiri "kalte egiteko" asmoz egindako adierazpenak izan zirela adierazi du Oiarbidek. Bidegiren egoera ona dela errepikatu du behin eta berriz, ordea, eta erakundearen esku lagako dituela Gipuzkoak errepide sarean berriki egin nahi dituen egitasmo nagusiak —GI-632 errepidean Antzuola-Bergara lotzeko errepide berria eta Etzegaraten ibilgailu astunei bidesaria kobratzen hasteko plana—. Bi egitasmoak datorren urte hasierarako martxan nahi dituzte.
