Sanferminetako egun batzuen etenaldiaren ostean, berriro ekin diete Nafarroako Gobernua osatzeko bilerei Geroa Baik, EH Bilduk, Ahal Dugu-k eta Ezkerrak. Hilaren 20an izango da Uxue Barkos presidente izendatzeko inbestidura saioa, eta, horren aurretik, gobernuaren organigramari izen-abizenak jarri behar dizkiote.
Adolfo Araiz EH Bilduko parlamentariak gaur Euskadi Irratian adierazi du "logikoa" litzatekeela gobernuak izango dituen bi presidenteordetzetako bat eurek izendatzea. Beren ordezkaritza parlamentarioa esanguratsua delako iritzi dio hori.
Gobernu akordioa "oso sakona" dela esan du, eta datozen lau urteetarako ez ezik, luzerako aldaketa ekarriko duten "oinarriak" finkatu dituztelakoan dago.
