EH Bilduk uztailean jakinaraziko ditu hautagaiak eta edukiak

Euskal Herria Bilduk uztailean jakinaraziko du zein izango den bere hautagaia eta Eusko Legebiltzarreko hauteskundeetara eramango dituen edukiak.Rufi Etxeberria ezker abertzaleko kideak Euskadi Irratian adierazi duenez, «kasik erabakita» daukate EH Bilduren lehendakarigaia nor izango den. «Laster jakingo da, ez dira aste asko pasatuko», esan du.

Bozetarako helburua lehen indarra izatea dela azpimarratu du Etxeberriak. «EH Bilduren xedea hauteskunde hauek irabaztea da, herri honek lidergo berria behar duelako». Azaldu duenez, koalizioak bultzatu nahi duen «politika egiteko molde berria» praktikara eramatea izango da beste alderdiekin elkarlanean aritzeko ezinbesteko baldintza. Hala, hauteskundeen ondotik EH Bildu prest dago EAJrekin elkarlanean aritzeko.Horretarako, baina, jeltzaleek «beste paradigma bat» erabili beharko luketela dio Etxeberriak, «azken 35 urteetan egin duten politikak egun ez duelako balio».

Legez kanpo uztea

Bestalde, Espainiako Barne Ministerioak Bildu legez kanpo uzteko egin duen mehatxuak «independentziari dioten beldurraren adierazle» dela uste du ezker abertzaleko ordezkariak. «Inkisizio politika ezagutzen ari gara. Legeztapenak ekarri beharko luke ezinbestekoa den normalizazio politikoa, baina ez dirudi PP eta estatuaren zenbait estamentu estrategia horretan sartuta daudenik», azpimarratu du.