EH Bilduko parlamentariekin batera iritsi da Hasier Arraiz Eusko Legebiltzarrera, atean komunikabide grafikoak zain zituela.
EAEko Auzitegiak Nagusiak herenegun kaleratutako epaian bi urteko espetxe zigorra ezarri dio Sortuko presidenteari —ez dute kartzelatuko—, eta denbora bereko inhabilitazio berezia ezarri dio kargu publikorako. Legebiltzarreko Mahaiak erabaki hori bete beharko du auzitegiko agindua jasotzean.
Segurako auziarekin loturik zigortu dute Arraiz. Sumario berean zigortutako beste 35 kideak bezala, fiskaltzarekin akordioa eginda saihestu du espetxea Sortuko buruzagiak. Bere gain hartu ditu fiskaltzaren akusazioak —ETAren aginduetara lan politikoa egitea—, eta indarkeriaren kontrako konpromisoa berretsi du.
Eva Blanco EH Bilduko legebiltzarkideak azaldu duenez, “lan politikoa egiteagatik” zigortu dute Arraiz, “beste behin”. Dena den, koalizio subiranistako kidea “ziur” azaldu da kargu publiikorako inhabiltatuta ere Arraizek jarraituko duela bere “ekarpenak” egiten.
