Shanghaiko sailkapenak neurtzen ditu goi mailako prestakuntza erakundeetan egindako ikerketen eragina eta prestigioa, eta gaur argitaratu dute aurtengoa. Euskal Herriko Unibertsitatea lehen 500 postuetan ageri da 2012az geroztik, eta aurten ere badago.
Zehatzago, 400. eta 500. postuen artean dago EHU. Zerrenda horrek multzoka sailkatzen ditu unibertsitateak; lehen 100 postuetan daudenak puntuazio baten arabera sailkatzen ditu, eta 100. postutik 200.era bitartekoak, 50eko bi multzotan. Hortik atzerakoak, ehunkako blokeetan ematen ditu, postu zehatza argitu gabe. Hala ere, EHUri buruz egin duen bilakaera grafikoan, hobekuntza nabari da iazko postuarekiko.
Amerikako Estatu Batuetako unibertsitateak dira nagusi rankingaren lehen postuetan. Harvardeko Unibertsitatea dago zerrendaren buruan. Hala ageri da azken hamabost urteetan.
Ez da Euskal Herriko beste unibertsitaterik ageri zerrendan.
