Espainiako Gobernuak Nafarroan duen ordezkari Carmen Albak debekatu egin zuen gaur arratsaldean Iruñean Ateak Ireki atariaren deitutako elkarretaratzea, baina protestari eustea erabaki dute antolatzaileek. Azaldu dutenez, mobilizazioa prestatzeko baldintzak bete dituzte, deialdia gutxienez hamar egun lehenago jakinaraziz. Arazo teknikoak zirela medio, ordea, jakinarazpena ez zen garaiz iritsi, eta protesta ez du baimendu Albak.
"Ateak Irekik uste du adierazpen askatasunaren aurkako eraso berri baten aurrean gaudela, Ateak Irekiren itxierari jarraituz", azaldu dute. Antolatzaileen iritziz, Espainiako Gobernuak Nafarroan duen ordezkariak "ahalegin bat" egin beharko luke manifestazio eskubidearen gauzatzea bermatzeko, "batez ere kontuan hartuta akatsa berea izan zela".
Atariak atxikimenduak jasotzen jarraitzen du, eta jada 44 kazetarik, bederatzi hedabidek eta eragile politiko eta sindikalek eman diote babesa, EAk, Aralarrek, Sortuk, Ezkerrak, ELAk, LABek, Eilasek, CGTk eta ESK-k, esaterako.
