Bi gobernuek asteon onartu dute ituna. Itunak ETB Nafarroan emititzeko hainbat konponbide tekniko jasotzen ditu; egungo multiplexaren bidez, balizko bigarren multiplex baten bidez edo eremu lokalerako erabiltzen diren multiplexen bidez. Bestelako alternatibak ere kontuan dituzte.
Nafarroako Gobernuak ohar bidez jakinarazi duenez, alderdi tekniko horiek jasoko dituzte Nasertic enpresa publikoak eta EITBk amaitzear diren memoria batean. Berri agentzien arabera, itun horretan aipatzen da EITBk Nafarroako errealitate politikoa, soziala eta instituzionala, sinboloak eta Nafarroako identitatea "errespetatzeko" konpromiso irmoa duela; Euskal Autonomia Erkidegotik bereizitako errealitate gisara aurkeztuko dutela Nafarroa. Horrez gain, "sentsibilitate politiko eta ideologiko desberdinak kontuan hartu eta errespetatuko dira", iritzi publiko "anitza" osatzen laguntzeko.
