EH Bilduren ustez, Eusko Jaurlaritzaren Bake eta Bizkidetza Planak "gabezia nabarmenak" ditu, eta horiek "zuzentze" aldera, hainbat zuzenketa aurkeztu dizkio. Gaur izan da azken eguna Bake Planari ekarpenak egiteko, eta Laura Mintegi eta Julen Arzuaga legebiltzarkideek goizean eman dituzte zuzenketa horien berri. Hainbat kritika egin dizkio Arzuagak planari: besteak beste, salatu du Jaurlaritzak biktimen arteko "mailaketa" egin duela, gatazkaren sustraietara ez doala eta "ahaztu" egiten duela oraindik giza eskubide guztiak ez direla errespetatzen. Bizikidetza alorrean ere desadostasunak ditu EH Bilduk, Jaurlaritzaren ikuspegia "hertsia eta itxia" delako. Horren aurrean Elkarbizitza Demokratikorako Akordio zabal bat egitea proposatu du EH Bilduk. Akordio horrek bermatuko luke proiektu politiko guztiak gauzatu ahal izatea, "inposizio, hertsatze edota inolako baldintza ez zilegirik gabe", Arzuagak azaldu duenez.
Horrekin batera, EH Bilduk bestelako ekarpenak egin dizkio Bake Planari. Tartean, proposatu du giza eskubideen urraketen "zigorgabetasunari" aurre egiteko justizia trantsizionala ezartzea, eta torturak pairatu dituztenei "laguntza, aitorpena eta ordaina ematea". Euskal presoen eskubideen urraketei aurre egiteko plana adostea eta Espainiako Segurtasun Indarrak Euskal Herritik joateko irizpideak ezartzea ere proposatu du koalizioak bere zuzenketetan.
