ETAk borroka armatua behin betiko utzi duela jakinarazi ostean, Patxi Lopez Eusko Jaurlaritzako lehendakariak ez du ezker abertzalea bere bilera errondara gonbidatu, baina ezker abertzalea ez da elkarrizketa politikoetatik aparte geldituko. Berak abiatuko du bilera saila, eta bihar arratsaldean bertan EAJko ordezkaritza batekin bilduko da. BERRIAk jakin ahal izan duenez, “alderdi guztiekin abiatuko duen harreman dinamikaren baitan kokatzen da” bilera hori.
Nazioarteko Konferentziaren eta ETAren jardun armatua uzteko iragarpenaren ostean sortu den egoera berrian “egin beharreko urratsez” hitz egitea da harreman horien helburua. Bere iritzian egin beharrekoa zer den argi dauka ezker abertzaleak: gatazkaren konponbide politikorako eztabaida abiatzea, batetik, eta “salbuespen egoerako neurriak ezabatzea”, bestetik. Neurri horiek ezabatzea Sortu legeztatzea eta presoen eskubideak betearaztea litzateke, besteak beste.
Euskal Herriko alderdiekin ez ezik, eragile sozialekin eta sindikalekin eta Herrialde Katalanetako alderdiekin ere egingo dituzte batzarrak. Katalanekin hitz egiteko garaian Txelui Morenok eta Pernando Barrenak osatuko dute ezker abertzaleko ordezkaritza.
