"Erregai fosilak ustiatu eta oligopolioa babestu ordez, autokontsumo eta ekoizpen garbiak lehenetsiko dituen lege propioa" bultzatzea horixe da EH Bilduren asmoa, eta hala azaldu dute Gasteizen egindako agerraldian ere.
Miren Larrionek ohartarazi du "agortua" dagoela egungo eredu energetikoa: "Gutxi batzuen aberastasuna bilatzen duen ereduak alternatiba behar du, jada sektore eta eremu oso ezberdinetatik eraikitzen ari den alternatiba, herritarra eta burujabea, inoren eta ezeren menpe egongo ez dena".
Alternatiba horren zenbait adibide ere eman dituzte, besteak beste, Okina eta Sabandoko berogailu komunitarioak, edota Araia, Labastida eta Berganzoko mini-hidraulikak.
Baina ahalegin hau Euskal Herri osora zabaldu ahal izateko elkarlana beharrezkoa da. Hori dela eta indar politiko eta sozialen babesa bereganatzeko prozesua abiatuko du EH Bilduk datozen hilabeteetan.
