Eduardo Zubiaurre Adegi Gipuzkoako enpresaburuak martxoaren erdialdean esandakoa berretsi du gaur Miguel Lazpiur Confebask EAEko enpresen konfederazioko buruak: ETAk ez diela enpresaburuei dirurik eskatu azkeneko hilabeteetan. Horrek enpresetako arduradunei "lasaitasuna" ematen diela adierazi du Lazpiurrek Onda Vasca irrati katean.
"Bakea gertuago" ikusten dela iritzi dio. "Albiste ona ez ezik, Euskadirentzat inbertsio ona litzateke bakea", Confebaskeko buruaren ustez.
"ETAren estortsioa iraganeko kontua" dela zioen duela hiru aste Zubiaurrek. "Zorionez, enpresaburuok pairatu izan dugun indarkeria mota hau garai bateko kontua dela dirudi".
ETAk urtarrilaren 10ean su-eten iraunkorra, orokorra eta egiaztagarria eman zuen. Harremanetarako Nazioarteko Taldeak astelehenean jakinarazi zuen larunbatean bilera egin zuela Londresen, su-etena egiaztatzeko bideak aztertzeko.
